Kvarnerflóinn í Króatíu 13. - 23. september 2018
Kvarner Króatía   KVARNER FLÓINN Í KRÓATÍU - SIGLT OG HJÓLAР
11 dagar / 10 nætur
Lágmarks fjöldi 12 manns, hámark 18
Fararstjórar Brandur Jón Guðjónsson og Robert Ciglar

Prentvæna útgáfu af þessum upplýsingum má fá hér

Þessi ferð er algjört ævintýri! Kvarner flóinn í Króatíu er fallegt og sólríkt svæði og þar eru fjölmargar eyjar, hólmar og sker. Farið er um nokkrar þeirra stærri á reiðhjólum en gist og snæddir morgun- og hádegis eða kvöldverðir um borð í báti sem ferjar þátttakendur á milli eyjanna, en sá bátur er frátekinn sérstaklega fyrir þennan hóp. Að lokinni hverri dagleið er hægt að sitja í sólbaði uppi  á þilfari, rölta um og skoða bæinn sem dvalið er í, fara í sjósund eða sólbað.

Kvarner Króatía

Dagleiðirnar eru uþb. 15 – 50 km, mis erfiðar, og vegna landfræðilegrar stöðu þá þarf alla dagana að fara um mis langar og mis brattar brekkur. Allar eru þær þó vel yfirstíganlegar og nægur er líka tíminn til að klára því að ekkert liggur á. Erfiðleikastig dagleiða er „létt“ til „miðlungs erfið“. Þetta er ekki keppnisferð og þátttakendur þurfa ekki að vera í neinu ofur formi, en vanir hjólreiðum.

Kvarner Króatía

Þetta er ferð fyrir “venjulegt” fólk til að njóta og upplifa!

Og ef einhver vill ekki koma með í hjólaferð dagsins getur viðkomandi verið um borð í bátnum og nýtt tímann til sólbaða eða bæjarrölts! Vænta má lofthita um 16-26°C og sjávarhita um 21-24°C.

(Einnig er hægt að skrá sig í þessa ferð án þess að taka þátt í hjólaferðunum).

Þar sem því verður viðkomið er boðið uppá að skipta hópnum í tvennt; hraðari/hægari, lengri/styttri, erfiðari/léttari.

Ferðin er ekki hlaðin neinum lúxus, káeturnar eru litlar og olnbogarýmið er takmarkað, en hér, eins og oft áður, mun sannast hið fornkveðna að „þröngt mega sáttir sitja“! Báturinn heitir MS Albatros, byggður 1935 og hefur verið endurinn-réttaður nokkrum sinnum, síðast undanfarna tvo vetur 2016/2017 (matsalurinn) og 2017/2018 (káetur neðan þilja). Allar káetur eru tveggja manna, og baðherbergi með salerni og sturtu er í hverri káetu.

Kvarner Króatía

Í upphafi ferðar verður dvalið í Ljublana og sú fallega borg skoðuð, síðustu nóttina verður dvalið í Salzburg.

Miðað er við að þátttakendur leigi sér góð fjallahjól, sem eru kjörin fyrir þessa ferð, en einnig er í boði að leigja góð rafhjól.

Lágmarks fjöldi er 12 manns, hámark 18 

Ferðaáætlun:

Dagur 1 – fimmtudagurinn 13. september

Flogið til Munchen / ekið til Ljubljana

Flogið með Icelandair til Munchen. Áætluð lending þar er kl 13:05 og við tekur akstur með áætlunarbíl til Ljubljana í Slóveníu.

Dagur 2 – föstudagurinn 14. september

Ljúfa Ljubljana

Dagurinn hefst á því að heimsækja hjólaleiguna þar sem að hjólin verða prófuð og stillt af fyrir hvern og einn. Síðan verður farið í hjólaferð um nágrenni borgarinnar og niður í miðbæ Ljubljana.

Dagur 3 til 9 – laugardagurinn 15. til föstudagsins 21. september

Eyjarnar í Kvarner flóanum

Ekið niður til Kvarnerflóans í Króatíu (u.þ.b. 2 ½ klst akstur) og í Rijeka er farið um borð í MS Albatros um hádegið á laugardeginum, - og þar með hefst hjólaferðin sjálf því að þann dag og þá næstu er farið í ferðir um nokkrar af eyjunum. Á meðan færir báturinn sig og tekur hópinn um borð á nýjum stað. Gist verður um borð í bátnum sem einnig ferjar hópinn á milli eyjanna.

Kvarner Króatía

Farið verður um fimm stærstu eyjarnar sem að hver og ein hefur sína sérstöðu og sjarma; Krk með samnefndan bæ og Vrbnik, þar sem að hið fræga Zlahtina hvítvín er framleitt; Rab með fallegan bæ og Kalifront skóginn; Pag með margra alda gömlum náttúrulegum ólívutrjám og Paski Sir, einn mest verðlaunaða sauðaost í heimi; Losinj með fallegar víkur og tvo vinalega samnefnda bæi; og Cres með fallega útsýnisstaði og samnefndan bæ.

Kvarner Króatía

Þó að svæðið sé ekki stórt er samt talsverður munur á landslaginu á milli eyjanna. Berangurslegar klappir vegna staðbundinna vetrarvinda, en síðan taka við skógi vaxin svæði með mörgum framandi trjátegundum og fjölbreyttri flóru; ótalmargar fallegar víkur; vinaleg þorp og bæir sem að kúra niður undir sjó í skjólsælum vogi bera langri byggðasögu vitni; landbúnaður og fiskveiðar o.s.frv.

Hver dagur er ný upplifun! Eðlilega, vegna þess að alltaf er byrjað við sjávarmál, er alla dagana um einhverja hækkun að ræða og farið allt frá uþb. 100 m.y.s. upp í uþb. 230 m.y.s. og samanlögð hækkun leiðarinnar getur þá orðið 300-1000 metrar. Dæmi: 16km/mesta hæð 197 m.y.s./samanlögð hækkun 408m – 47km/mesta hæð 225 m.y.s./ samanlögð hækkun 943m – 35km/mesta hæð 100 m.y.s./ samanlögð hækkun 720m – 24km/mesta hæð 105 m.y.s./ samanlögð hækkun 515m. Hjólaleiðirnar eru ýmist á sléttu malbiki, á malarstígum eða á grófum stígum, en slíkt undirlag er í miklum minnihluta og ferðahraðinn að sjálfsögðu alltaf í takt við aðstæður.

Kvarner Króatía

Seinnipart föstudagsins er komið til hafnar í Rijeka. Farið í gönguferð inn í miðbæinn og þar verður snæddur kvöldverður, en síðan gist um borð í Albatros síðustu nóttina.

Dagur 10 – laugardagurinn 22. september.

Salzburg

Lagt af stað frá Rijeka að morgni með bíl upp til Ljubljana, hjólunum skilað, og síðan haldið áfram og komið til Salzburg seinnipartinn. Eftir innritun á hótelið er lokið verður farið í skoðunarferð með leiðsögn um miðbæinn til þess að kynnast þessari fallegu borg betur. 

Dagur 11 – sunnudagurinn 23. september.

Heim á leið

Lagt af stað að morgni með lest yfir til Munchen, flugið þaðan er kl. 14:05 og áætluð lending um kl. 16:00

Kvarner Króatía 

Tveir fararstjórar eru með hópnum allan tímann; Íslendingurinn Brandur Jón og Slóveninn Robert, góðir vinir og félagar sem hafa unnið vel saman mörg undafarin ár.

Kvarner Króatía

Þjónusta & verð 

Innifalið í verði ferðar:

Flug og flugvalla-skattar

13.09.2018: Keflavík - Munchen,

Áætluð brottför 07:25 lending 13:05

23.09.2018: Munchen – Keflavík,

Áætluð brottför 14:05 lending 16:00

Vinsamlegast athugið að flugtímar geta breyst.

Gisting

Gisting í þrjár nætur á hóteli og sjö nætur um borð í Albatros

 

Matur

Morgunverður:

Innifalinn alla dagana

Hádegis- eða kvöldverður:

Innifalin ein máltíð á dag alla siglingardagana (frá laugardeginum 15. til föstudgsins 21. sept.), en hvorugt í Ljubljana og Salzburg

Flutningur

Allur akstur og siglingar samkvæmt áætlun ferðarinnar

Farar-stjórn

Brandur Jón Guðjónsson og Robert Ciglar

(Fundur með íslenska fararstjóranum fyrir ferðina)

Ekki innifalið: 

Hádegisverðir eða kvöldverðir, einn á dag á siglingardögunum, en hvorugt í Ljubljana og Salzburg

Drykkir með hádegis- eða kvöldverðum

Hjólaleiga - fjallahjól €130,- / rafknúin fjallahjól €240,- (greiðist beint til leigunnar)

Hafnargjald, samtals €21,- (greiðist beint til skipstjórans)

Annað það sem ekki er talið upp í „innifalið“

 

Verð:

Verð á mann í tveggja manna herbergi/káetu

ISK 319.900,- staðgreitt

Verð á mann í eins manns herbergi/káetu

 

ISK 369.900,- staðgreitt

Greiðslur og gjalddagar:

Staðfestingargjald:

Staðfestingargjald ISK 75.000 þarf að greiða innan 7 daga frá pöntun. Athugið að staðfestingargjald fæst ekki endurgreitt ef til afbókunar af hálfu viðskiptavinar kemur.

Lokagreiðsla:

Til að staðgreiðsluverð gildi þarf að greiða ferð að fullu í síðasta lagi 8 vikum fyrir brottför, annars hækkar verð um 5%.

Frekari upplýsingar og skráning í síma 510 9500 eða sendið fyrirspurn á info@explorer.is

 

Farþegar í göngu- og hjólaferðum Íslandsvina njóta sérkjara í útivistarvöruverslununum „Fjallakofinn“ og gilda þau frá því að staðfestingargjald hefur verið greitt og út almanaksár ferðarinnar.

| More